زيزو: لم أوقع لأي ناد وأنتظر رد الزمالك حتى نهاية الكونفدرالية

كتب: سعيد شريف

أكد أحمد مصطفى “زيزو” نجم الزمالك أنه لم يوقع لأي ناد مشددا على احترامه الكبير لكيان القلعة البيضاء.

وكتب زيزو عبر “استوري إنستجرام”: “الحمد لله أنا شخص يحترم الجميع لكن للأسف عدم ردي على المعلومات المغلوطة والتزامي بالصمت زاد الأمور سوءا حيث تتكرر الأخبار عن توقيعي أو تجديد عقدي كل ساعة وكل شخص يحاول استمالة فئة معينة من الجمهور”.

وأضاف: “بكل وضوح لم أوقع لأي ناد سواء داخل أو خارج مصر ومن يدعي أنه حصل على توقيعي فليعلن عن ذلك إذا كان كلامه صحيحا كما أن من لديه دليل على توقيعي لأي ناد فليظهره للجميع يجب أن يعرف الناس الحقيقة”.

وتابع: “أنا بقدر جدا الكيان الكبير اللي أنا بلعب فيه.. ولا يمكن أنكر فضله عليا لكن فيه حاجة أنا مكنتش حابب أتكلم فيها خالص لأنه للأسف الأمور في الإعلام كلها في اتجاه واحد ليه محدش اتكلم عن حقوقي المشروعة زي أي لاعب في الدنيا”.

واكمل: “ليه محدش اتكلم إن الناس سابتنى بقالها شهور طويلة ومش عايزين يجددوا عقدى.. ليه محدش اتكلم عن المستحقات المتأخرة اللي ليا بقالها كثير ومش لاقي حد”.

زيزو: لم أوقع لأي ناد وأملك عروضا تفوق 10 أضعاف.. والقرار بيد الزمالك

واختتم: محدش كمان اتكلم أنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده قلت وهفضل أقول أنا منتظر كلمة النادي ورد لاعتبارات كتير مش لتجميل الصورة.

الجماهير لازم تكون عارفة الحقيقة زيزو مش بيزايد ولا بيتاجر لكن لازم الطرف الثاني يكون عايزني أكمل وتكون فيه استجابة لحاجة من المعروض عليا على الأقل لكن للأسف الكلام معايا حاجة واللي بيتقال للإعلام حاجة تانية

أنا مينفعش أجرح في حد ولا أتكلم في حق حد لأن اللي بيتقال في الجلسات عيب يتقال برة على الأقل من ناحيتي أنا مستني رد النادي لحد آخر يوم في الكونفدرالية وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده  هيكون كلام غير صحيح.

ورسالتي الودية جدا للمسئولين في النادي اللي أنا بحترمهم جميعا أتمنى الحوار في مسألة تجديد العقد يكون بيني وبينكم مش عن طريق الإعلام وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق شكرا على تفهمكم موقفي.